Radio Antenn 101 FM - "Eurovision"-nun formatında bəzi dəyişikliklər ediləcək

Dəyişikliklərin artıq Norveçdə tətbiq ediləcəyi istisna edilmir.

Məlum olduğu kimi, 55-ci “Eurovision-2010” Mahnı Müsabiqəsi mayın 25-dən 29-dək Norveçin paytaxtı Osloda keçiriləcək. Bu ölkəyə qələbəni “Eurovision-2009”un norveçli iştirakçısı Aleksandr Rıbak gətirib. Müsabiqə Şimali Avropanın nəhəng qapalı idman – konsert kompleksi “Telenor Arena”da keçiriləcək. Skandinaviyanın ən nəhəng idman kompleksinin 23 mindən artıq tamaşaçı qəbul etmək imkanı var. Müsabiqənin nümayişinin təşkilatçısı NRK kanalı olacaq. “Eurovision-2010” Mahnı Müsabiqəsinin aparıcıları Norveçin məhşur teleaparıcıları Erik Solbakken və Haddi Hyijen olacaqlar. Eurovision.tv-nin məlumatına əsasən, Avropa Yayım Şurası müsabiqənin formatında bəzi dəyişikliklər planlaşdırıb. Dəyişikliklərin artıq Norveçdə tətbiq ediləcəyi istisna edilmir. Belə ki, əvvəllər ancaq bütün iştirakçıların çıxışından sonra 15 dəqiqə ərzində səsvermə mümkün idisə, dəyişikliklərə əsasən, bu dəfə tamaşaçılar bütün mahnılar ifa edildikdən sonra deyil, müsabiqənin nümayişinin tam gedişatında səs verə biləcəklər. Bunun xaricində isə canlı orkestrin minus-fonoqrama ilə əvəz olunmasının qadağan olunub-olunmayacağı müzakirə olunacaq. Teleprodüsser və "Eurovision”un icraçı direktoru Svante Stockselius bildirib ki, müsabiqənin yarımfinal mərhələlərində iştirakçıların ümumi balları tamaşaçı səsləri və peşəkar münsiflər heyyətinin verdiyi qiymətlərlə hesablanacaq. Qeyd edək ki, ötən il belə qiymətləndirmə yalnız finalda tətbiq edilmişdi. Belə olduqda isə münsiflər heyyəti mahnıları bir neçə dəfə dinləyə biləcək və onlarla daha dərindən tanış ola biləcək. Bu cür yeniliklər bütün tamaşaçı səslərinin nəzərə alınması və bəzi ölkələrin səslərinin qısa müddət ərzində hesablanmasının texniki cəhətdən mümkün olması ilə izah edilir. Norveç müsabiqəyə 17 milyon avro xərcləməyi planlaşdırıb.