 Bu gün Ermənistanın xarici işlər naziri Edvard Nalbandyanın Parisdə həmsədrlərlə görüşəcəyi və rəsmi İrəvanın yenilənmiş Madrid təkliflərinə münasibətini açıqlayacağı gözlənilir.
Bundan əvvəl isə o, Almaniyada bu ölkənin xarici işlər naziri Qido Vestervelle ilə görüşüb. Görüşdə Dağlıq Qarabağ münaqişəsinin həlli yolları və Türkiyə-Ermənistan münasibətləri, eləcə də protokolların ratifikasiyası məsələsi müzakirə olunub.
Almaniyalı nazir Dağlıq Qarabağ münaqişəsinin ATƏT-in xarici işlər nazirlərinin 2008-ci il Helsinki və 2009-cu il Afinada verdiyi bəyanata uyğun olaraq sülh yolu ilə həllini rəhbər tutduğunu deyib. Türkiyə- Ermənistan münasibətlərinə toxunan Qido Vestervelle bu tarixi imkanın əldən verilməməsi üçün tərəflərin səylə çalışacağını bildirib.
Nalbandyan deyib ki, Türkiyə Ermənistanla münasibətləri normallaşdırmaq istəyirsə, protokolları tezliklə ratifikasiya etməlidir. Almaniyanın xarici siyasət üzrə şurasında çıxış edən erməni nazir bildirib ki, Türkiyə ratifikasiya məsələsində heç bir şərt irəli sürməməlidir. Nalbandyan həmçinin Almaniya kanslerinin xarici siyasət və təhlükəsizlik məsələləri üzrə köməkçisi Kristof Xoyqsen və Bundestaqın xarici məsələləri üzrə komissiyasının sədri Ruprext Polenslə görüşüb. |
