 Türkiyənin xarici işlər naziri Əhməd Davudoğlu ABŞ və İsveçdə uydurma “erməni soyqırımı” haqqında qərarların qəbulu ilə əlaqədar Böyük Millət Məclisinin (TBMM) Xarici İşlər Komissiyasında çıxış edib.
Türkiyənin Akşam” qəzetinin verdiyi xəbərə görə, martın 15-də keçirilən qapalı toplantıya ölkənin ABŞ və İsveçdəki səfirləri Namiq Tan və Zərgün Korutürk də qatılıb. Səfirlər 3 saatlıq toplantıda ABŞ və İsveçdə qəbul olunmuş qərarlar barədə millət vəkillərini məlumatlandırıblar.
Komissiyanın müxalifətdən olan üzvləri hökumətin Ermənistan siyasətini tənqid ediblər. Milliyyətçi Hərəkat Partiyasından (MHP) olan sabiq diplomat Dəniz Bölükbaşı ABŞ Nümayəndələr Palatasının müvafiq komitəsinin qərarından sonra Türkiyə ilə Ermənistan arasında imzalanmış protokolların öz mənasını itirdiyini, bu səbəblə sənədlərin parlamentdən geri götürülməsini istəyib. Eyni partiyadan olan Tunca Toskay da Ermənistanla normallaşma prosesi başladıqdan indiyədək heç bir müsbət hadisənin baş vermədiyini söyləyib: “Ermənistan bizim şərq vilayətlərimizə hələ də Qərbi Ermənistan deyir, “soyqırım” məsələsində israrını davam etdirir. O zaman bu proses hansı işə yarayıb? Əksinə, Türkiyə ilə Azərbaycan arasında strateji əməkdaşlıq zədələnib”.
Cümhuriyyət Xalq Partiyasından (CHP) olan üzvlər isə Türkiyədə qeyri-leqal yaşayan və çalışan Ermənistan vətəndaşlarının deportasiyasını tələb ediblər. Lakin nazir Ə. Davudoğlu müxalifətin təklifləri ilə razılaşmayıb. O, Ermənistanla başlayan normallaşma prosesinin uğurla davam etdiyini və bu ölkəyə qarşı sanksiya tətbiq etmək istəmədiklərini vurğulayıb: “Protokolların geri götürülməsi nəticə verməz”. Ə. Davudoğlu hesab edir ki, protokollar uydurma “soyqırım” iddialarına qarşı tormozlayıcı rol oynayır. |
