"Olimpik-Şüvəlan" və "Standard" komandaları arasında keçirilən oyundan sonra qalmaqal baş verib.
Futbol üzrə Premyer Liqanın XXIII turunda "Olimpik-Şüvəlan" və "Standard" komandaları arasında keçirilmiş oyundan sonra qalmaqal baş verib. Matçın gedişində meydan sahiblərindən Tərlan Xəlilovla qonaqların futbolçusu David Çiçveişvili arasında yaranan mübahisə qarşılaşmanın ardından əlbəyaxa döyüşə keçib. "Standard"ın gürcü futbolçuları Serqi Orbeladze ilə David Çiçveişvili Tərlan Xəlilova hücum ediblər. Çiçveişvili Xəlilova arxadan, Orbeladze isə qarnına təpik atıb. Bundan sonra hər iki komandanın futbolçuları məsələyə qarışıblar. Münaqişənin kütləvi qarşıdurmaya keçməsinə polislər və "Olimpik-Şüvəlan"ın mühafizə xidməti imkan verməyib. Meydan sahiblərinin məşqçisi Səmədağa Şıxlarov isə baş hakim Rauf Cabbarova oyundakı idarəçiliyi ilə bağlı iradlar bildirib. Cabbarov Şıxlarova cavab qaytarıb. Bu zaman iki şəxs arasında "söz savaşı" yaşanıb. Qeyd edək ki, "Olimpik-Şüvəlan" - "Standard" matçı qonaqların 2:1 hesablı qələbəsi ilə başa çatıb.
10:48 13/03 | 146 dəfə oxunub 0 qeyd yazılıb Xəbəri çap et
