 Türkiyənin xarici işlər naziri Əhməd Davudoğlu isveçli həmkarı Karl Bildtdə görüşüb.
Görüşdə İsveç parlamentinin Komitəsində “erməni soyqırımı” ilə bağlı qəbul olunan qərar müzakirə edilib. Əhməd Davudoğlu görüşdən sonrakı açıqlamasında İsveç parlamentinin qərarından təəssüfləndiyini bildirib. Onun sözlərinə görə, tarixi məsələlər parlamentlər tərəfindən dəyərləndirilməməlidir. Türkiyəli nazir bildirib ki, millət vəkillərinin əksəriyyəti tarixi hadisələrlə bağlı kifayət qədər məlumatlı deyillər, nə keçmişdəki, nə də Türkiyədəki mövcud durumu yaxşı bilmirlər: “Hesab edirik ki, bu qərar böyük səhvdir, qəbul etməyimiz mümkün deyil. Əgər parlamentlər belə qərarlar qəbul etməyə başlasalar, siyasi olduğu qədər də intellektual bir xaos yaranar. Tarixin bu şəkildə siyasiləşdirilməsi cəmiyyətlərini üçün böyük problemlərə səbəb ola bilər”.
Əhməd Davudoğlu onu da bildirib ki, Türkiyə-İsveç münasibətləri yüksək səviyyədə olub, iki ölkə arasında strateji müttəfiqlik yaranıb. Onun sözlərinə görə, gələn həftə Türkiyənin baş naziri Rəcəb Tayyib Ərdoğanın İsveçə səfər etməsi və əlaqələrin daha inkişaf etdirilməsi planlaşdırılırdı.“Əlaqələri o səviyyəyə çatdıracaqdıq ki, tğək Avropada yox, bütün dünyada bir örnək olacaqdı” deyən nazir məlumat verib ki, parlamentdə qəbul olunan qərardan sonra Rəcəb Tayyib Ərdoğanın səfəri ləğv edilib.
Jurnalistlərdən birinin Avropada “erməni soyqırımı” ilə bağlı bu cür qərarlarının qəbulu davam etsə, Türkiyənin hansı addımları atacağı ilə bağlı sualına Əhməd Davudoğlu belə cavab verib: “Təbii ki, əvvəllər olduğu kimi bunda sonra da Türkiyənin reaksiyası çox sərt olacaq. Biz öz tariximizi başqalarının dəyərləndirməsinə icazə vermərik. Bəziləri üçün 1915-ci il erməni məsələsi kimi görünə bilər. Amma bizim üçün 1915-ci il bir ulusun ölkəsini çox böyük ordulara qarşı müdafiə etdiyi Çanaqqala savaşı deməkdir”.
Əhməd Davudoğlu bildirib ki, rəsmi Ankara tarixi mövzularla bağlı mübahisə etmək niyyətində deyil. Onun fikrincə, belə mübahisələr əvəzinə bütün avropalıların və Qafqaz xalqlarının parolaq gələcəyi üçün birlikdə çalışmaq lazımdır: “Əgər belə şeylər təkrarlansa, Türk xalqı bu cür təhqirləri əsla qəbul etməyəcək. Bu cür qərarlar qəbuledilməzdir və tədbir görmək məcburiyyətində qalarıq”. |
