Tədbirdə “Xocalı soyqırımı rabitəçilərin yaddaşında” kitabının təqdimat mərasimi də keçirilib.
M. F. Axundov adına Milli Kitabxanada “Xocalı soyqırımı - əsrin faciəsi” adlı sərginin açılışı və “Xocalı soyqırımı rabitəçilərin yaddaşında” kitabının təqdimat mərasimi keçirilib. Tədbiri Milli Kitabxananın direktoru Kərim Tahirov açaraq o ağrılı günləri bir daha yada salıb və bu faciənin Azərbaycan xalqının yaddaşından silinməyəcəyini deyib. Mədəniyyət və turizm nazirinin müavini Sevda Məmmədəliyeva, rabitə və informasiya texnologiyaları nazirinin müavini İltimas Məmmədov da xüsusi amansızlıqla törədilmiş qanlı cinayət əməlindən danışıblar. Sonra tədbir iştirakçıları “Xocalı soyqırımı - əsrin faciəsi” adlı sərgi və təqdimatı keçirilən kitabla tanış olublar. Sərgidə Xocalı faciəsinə həsr olunmuş 200-dən çox müxtəlif dillərdə çap olunmuş kitab, jurnal, qəzet materialları nümayiş etdirilib.
