Dünyadakı 2,5 min şirkət və dövlət müəssisəsində kompyuterlərin yeni virusa yoluxduğu məlum olub.
İnternet təhlükəsizliyi üzrə mütəxəssislər şəbəkədə yeni ciddi təhlükə olduğunu aşkar ediblər. Dünyadakı 2,5 min şirkət və dövlət müəssisəsində kompyuterlərin yeni virusa yoluxduğu məlum olub. “Kneber” adlandırılan zərərli proqram ilk dəfə 18 ay əvvəl şəbəkənin təhlükəsizliyinin təmin edilməsi ilə məşğul olan “NetWitness” şirkəti tərəfindən aşkarlanıb. Şirkətin məlumatına görə, virus zəbt edilmiş maşınları uzaq məsafədən idarə olunan qondarma “botnet” şəbəkəsində birləşdirir. Hazırda internetdə 5,9 minə yaxın botnet mövcuddur ki, onlardan məxfi məlumatların ələ keçirilməsində, müxtəlif server və saytlara kütləvi hücumların təşkilində istifadə olunur. Məlumatlara görə, “Kneber” botneti Şərqi Avropadan olan internet cinayətkarları tərəfindən yaradılıb. Virusu yaymaq üçün onlar Çindəki kompyuterlərdən istifadə ediblər. “Kneber”in nə məqsədlə yaradıldığı hələlik aydın deyildir. “NetWitness” şirkətindən bildiriblər ki, bu proqram yoluxmuş kompyuterlərdən müxtəlif məlumatları - şəxsi və xidməti poçtun, korporativ veb-saytların login və parollarını, sosial şəbəkələrdəki bank hesablarını, istifadəçinin şəxsi məlumatlarını toplamağa xidmət edir.
10:01 22/02 | 222 dəfə oxunub 1 qeyd yazılıb Xəbəri çap et
