 Avropa Şurası Parlament Assambleyası (AŞPA) monitorinq komitəsinin Azərbaycan üzrə həmməruzəçiləri Andres Herkel və Jozef Debono Qrex bu gün Azərbaycana rəsmi səfərə gəliblər.
Avropa Şurasının Azərbaycandakı İnformasiya Ofisindən verilən məlumata görə, həmməruzəçilər əvvəlcə Gəncəyə səfər edərək orada yerli hakimiyyət və hüquq-mühafizə orqanlarının rəhbərləri, Gəncə Apellyasiya Məhkəməsinin sədri ilə görüşəcəklər. Rəsmi görüşlər isə sabah – fevralın 9-da başlayacaq.
Həmməruzəçilər Bakıda Azərbaycan prezidenti İlham Əliyev, ədliyyə naziri, milli təhlükəsizlik naziri, parlamentin spikeri, baş prokuror, MSK sədri, media nümayəndələri, ombudsman və Azərbaycanın AŞ PA-da nümayəndə heyətinin üzvləri ilə görüşəcəklər. Həmməruzəçilər səfərin yekunu olaraq “Azərbaycanın Avropa Şurası qarşısında üzərinə götürdüyü öhdəliklərin icra vəziyyəti” adlı məruzə hazırlayacaqlar. Səfər fevralın 11-də başa çatacaq. |
