Sensasiya ilə əlamətdar olan matç nümayiş etdirilib.
Anqolada təşkil olunan Afrika Millətlər Kubokunun açılış matçı sensasiya ilə əlamətdar olub. Turnirin ilk oyununda meydan sahibləri ilə qarşılaşan Mali yığması futbol tarixində görünməmiş hadisəni gerçəkləşdirib. Belə ki, Mali futbolçuları 0:4 hesabı ilə uduzduqları halda, son 12 dəqiqədə 4 qol vuraraq, məğlubiyyətdən yaxa qurtarıblar. Matçda üstünlüyə malik olan Anqola milli komandası fasiləyə 2:0 hesabı ilə öndə yollanıb. 78-ci dəqiqəyədək anqolalılar daha 2 dəfə rəqibi cəzalandırıblar. Lakin sona yaxın gözlənilmədən oyunun axarı tərsinə dəyişib. Mali yığması “Barselona”da çıxışı ilə tanınan Saidu Keytanın dublu, “Sevilya”nın şərəfini qoruyan Frederik Kanut, həmçinin Yatabarenin qolları ilə bir xal qazanıb hesabı fantastik dərəcədə dəyişdiriblər - 4:4. Özü də onlar axırıncı iki qolu 90+3 və 90+4-cü dəqiqələrdə vurublar.
10:54 11/01 | 666 dəfə oxunub 1 qeyd yazılıb Xəbəri çap et
