Bir neçə gün davam edəcək mədəniyyət günlərində daha çox mərakeşlinin iştirak etməsi üçün, tədbirlərin eyni vaxtda Krallığın bir neçə şəhərində keçirilməsi nəzərdə tutulur.

Mərakeş krallığında Azərbaycanın mədəniyyət günləri keçiriləcək. Bu barədə Mərakeşin mədəniyyət naziri Bensalim Himmiş Azərbaycan Televiziyasına müsahibəsində deyib. Nazir bildirib ki, tədbirlər Mərakeşin bir neçə şəhərini əhatə edəcək. Oktyabr ayının üçüncü ongünlüyünə planlaşdırılan tədbirlər çərçivəsində Azərbaycan mədəniyyətinin fərqli sahələri ilə tanışlıq nəzərdə tutulub. Rəsm sərgilərinin, muğam axşamlarının rəqs konsertlərinin keçiriləcəyi gözlənilir. Krallığın mədəniyyət nazirinin fikrincə, mədəniyyət günləri mümkün qədər çox sahəni əhatə etməlidir.Bir neçə gün davam edəcək mədəniyyət günlərində daha çox mərakeşlinin iştirak etməsi üçün, tədbirlərin eyni vaxtda Krallığın bir neçə şəhərində keçirilməsi nəzərdə tutulur. Bu məqsədlə turistlərin də tez-tez ziyarət etdiyi şəhərlər seçilib. Hazırda Azərbaycanın mədəniyyət günlərinin dəqiq proqramının tərtib edilməsi ilə bağlı Bakı və Rabat arasında danışıqlar davam edir.